Nûştoxanê Yenî Ozgur Polîtîka ra Selahattîn Erdemî, di nûşteya xo ya ney hefteyî de, alozîya ewroyî ya Vaşûrê Kurdistanî û helwestêy PKK û PDK, reyna destgirewtişê na mjare hetê dormeyan ra, arda ziwan.
Nûşteya Selahattîn Erdemî wina ya.
Seba ke persgirayêke rê çareserîye bêro dîyiş, gere di serre de persgira raşt bêro fehmkerdiş.
Persgiraya ke ci rê ro çareserîye yeno gêrayiş, rewşa sîyasetê Kurdan, îhtîmalê şerrê xomîyanî û çinbîyişê yewîtîyêka demokratîke yê.
Bi vatişêko bîn, alozîya maberê PKK û PDK û îhtîmalê şerrêke yê.
Na persgira, bi sewqkerdişê hêzanê PDK yê Zînê Wertê, dest pê kerd û resa 5’ê Hezîrane, qewemîyayişê Metîna.
Bi awayêko raşt yan zî şaş, xêncî Dewleta Tirke, herkes vano;”Gere şerrêko winayin nêvecîyo û gere yewîtîyêka demokratîke ya sîyasetê Kurdan, bêro pêkardene”.
La mesela, do na senî bêro pêkardiş a.
Êy ke naye anê ziwan zî, PKK û PDK’ye di heman rewşe de nîşan danê û her didiyine zî di heman aste de, verpersîyar vînenê.
Û vanê,”Ma di na alozîye de terefîy nîyê û veng ro her didi perran kenê”.
Gelo! No vengdan di pratîkî de, encamêke geno?, nê.
Verapeyê naye, PDK zafêrî êrîşanê xo domnena.
Çimkî, se bikero zî bi PKK’yî reyde, heman aste de yena destgirotiş.
No zî, êrîşkarî û pêkardişê têkilîyê qilêrinan yê rayirberîya PDK, zafêrî aver fîneno.
Îtîya de şaşîya tewir pîle,PDK û PKK’yî di heman aste de dîyiş û di heman aste de, verpesîyar girotiş o.
La raştîye wina nîya û vindertişê PDK û PKK, bi heman awayî nîyê.
Herkes vîneno ke Dewleta Tirke û îqtîdarê AKP-MHP, bi hêza ke NATO ra genê êrîşê PKK’yî kenê û wazenê çinê bikerê.
PKK zî verva ney êrîşî, bi heme hêza xo, xo ver dano.
No şerr, hemeyê Kurdistanî ra vila bîyo û PDK zî mîyan de, ro heme dormeyan tesîr keno.
Raştî û muhîmîya mijare, îtîya ra dima dest pê kena.
Şerrê maberê PKK’yî û Dewleta tirke, ewro heme wextan zafêrî pîl û xidar o.
Dewleta Tirke, zê tucarêke nêy şerrî dana bazarkerdiş.
Rayirberîya PDK zî sebe ke rantê ney şerrî ra qezencêke bi dest bifîno, bi dewleta tirke û îqtîdarê AKP-MHP reyde kewena mîyanê têkilîyan û gêrîllayanê PKK’yî îxbar kena û pey ra dorme kena.
Baş o, di na rewşe de merdim şikeno PKK û PDK’ye, bi heman awayî bigero dest.
Gelo na bêwijdanîye nîya?
PKK vano, bê ma verva îşgalkeran têreyde şerr bikerê, PDK vana wa PKK Vaşûrî ra, bivecîyo.
Bi goreyê ferasetê welatpawêrîye, na helwesta PDK raşt a?.
Nê raşte nîya û na helwesta şaşe, bena sebebê persgirayanê maberê PKK û PDK.
PDK, bi na helwesta xo, êdî asta hemkarî û îxanetî zî derbas kerdê.
Verva nêy heme raştîyan, çira tay dormey alozîye ra PKK û PDK’ye di heman aste de verpersîyar vînenê û nêeftarenê verva PDK, çîyêke bivajê û tenê PDK rexne bikkerê.
Di heme qiseykerdişanê xo de PKK’yî zî, bi PDK reyde kenê ortax.
Heke çîyêy ke PDK kena, PKK’yî bikerdayêne, do verva PKK’yî bibayêne zê şêran û di asta tewir berze de rexneyê xo biardêne ziwan.
Erdem, nûşteya xo wina bi peynî keno.
Tay hêzîy, bi sebebo ke partîya Kurde ya yewîne ya, rêzdarîye nîşanê PDK, danê.
La gere bêro zanayiş, PDK ya ewroyine, PDK ya Qazî Muhammedî, PDK ya roşinvîranê Kurdan ya Silêmanîye nîya.
Na partîye, hetê Mela Mistefa Barzanîyî ra, bi derrbeyêke amî bidestvistene û ewro zê partîyêka Barzanîyan a.
Merdim nêşikeno vaco, partî zî.
Bi temamî zê rayvistinêka, eşîretî ya.
Heme sîyasetê PDK, seba menfîetê eşîretî û malbata Barzanîyan o.
Helwesta tewir raşte ya welatpawêrîye,persgira fehmkerdiş û verva zîhnîyet û polîtîkayanê PDK, vecîyayiş o.
