ASTENGKIRINA HEYETA AŞTIYÊ
KNK: EW MÊVANÊN KURDISTANÊ NE Û DOSTÊN GELÊ ME NE
Kongreya Netewî ya Kurdistan KNK’ê têkildarî astengkirina endamên heyeta Aştiyê ya li Hewlêrê daxuyaniyek nivîskî weşand.
KNK’ê destpêkê bal kişand ser êrişên Dewleta Tirk li dijî Başûrê Kurdistanê û wiha got;
Ji bo hevdîtin, aştî û diyalogê komek dostên Kurd berê xwe dan Başûr, lê mixabin hinek rayedarên Hewlêrê, van dostan asteng dikin û nahêlin karê xwe bikin. Bi navê wezareta navxwe daxuyanî têne dayîn ku ev daxuyanî van dostan reş dikin û wan weke çalakvanên dijî ewlehiya Herêmê nîşan didin. Bi tevahî ew daxuyanî û ew îdîa ji rastiyê dûr in û ne di xizmeta gel û berjewendiyên herêmê de ne.
KNK’ê ragihand ku ew kesên çûne Başûr, dostên gelê me ne û wiha got;
Ew kes di berxwedana Kobanê de, şerê Efrîn, Girê Spî û Serêkaniyê de û li berxwedana Şengal û gelek deverên din yên Kurdistanê, cihê xwe li cem gel û berxwedêrên Kurd girtine û bedel dane. Herweha van kesan di asta Cîhanê de doza gelê Kurd dane naskirin û weke dîplomatên Kurd xebitîne. Ew niha jî bi vê niyetê bi vê helwestê hatine Kurdistanê. Ew mêvanên ezîz yên Kurdistanê ne. Pêwîste em mêvanperweriya xwe li hember wan nîşan bidin.
KNK’ê bang li hukumet û asayîşa Herêma Kurdistanê kir ku van dostan asteng nekin, rê li ber wan xweş bikin û wan weke mêvan bibînin.
