ARTÊŞA TIRK A DAGIRKER
LI BAŞÛRÊ KURDISTANÊ AGIRÊ NEWROZÊ QEDEXE KIR
Di 21’ê Adarê de şêniyên gundên Herêma Biradost ya ser bi Hewlêrê ji ber zextên eskerên artêşa tirk a dagirker ve nekarîn agirê Newrozê pêxin.
Welatiyên gundên Bermîzê, Deşta Hêrt, Geliyê Şêxzadan, Xelîfan û Hêşmî yên Herêma Biradostê ji bo pîrozkirina cejna Newrozê xwestin agir pêxin.
Lê eskerên dewleta Tirk ku li herêmê hin dever dagir kirine ji bo belavkirina gel gule reşandin hewayê û nehiştin gel agirê Newrozê pêxe.
Weke di dîmen de jî diyar dibe, eskerên artêşa Tirk bi wesayîtên zirxî ketine nava gund û nahêlin xelkê herêmê cejna xwe pîroz bikin.
Balkêşe ku ev yek di nava xaka Başûrê Kurdistanê de pêk tê û heya niha ji rayedarên herêmê ti daxuyaniyeke fermî nehatiye dayîn.
Dîmen di medya civakî de rastî nerazîbûnê hatin.
Hêjayî gotinê ye heman rojê Rêveberê bajaroka Sîdekan Îhsan Çelebî jî şahiya pîrozkirina Newrozê ya li Sîdekanê qedexe kiribû.
