Gerîlayê YRK’ê Rûbar Efrîn destnîşan kir ku ji bo jiyaneke bi rûmet pêwîstiya gelê Kurd bi şerekî gel ê şoreşgerî heye û got, “Yekane rêya ber bi demokrasî û azadiyê ve, fikir û felsefeya Rêber Apo ye.”
Rûbar Efrîn qala pêvajoya tevlîbûna xwe ya li nava refên gerîla kir û wiha axivî, “Yek ji sedemên tevlîbûna min a li nava refên gerîla şehadeta hevalê min Rêbaz bû ku çalakiya fedayî kir. Niha hewl didim xwe bigihînim asta şehîd Rêbaz, tola şehîdan hemûyan hilînim û azadiyê pêşkêşî dayikên Kurd bikim. Li vê derê her kes bi felsefe û îdeolojiya Rêber Apo tevdigere. Paradîgmaya Rêbertî jiyaneke ewkhev û fikrekî azad pêşkêş dike. Ji ber ku jiyana li nava gerîla jiyaneke wekhev e, her kêliya wê ji bo min erênî ye. Ev jî dibe wesîle ku em felsefeya Rêber Apo baştir nas bikin.”
‘AZADIYA RÊBER APO WÊ BIBE SEDEMA AZADIYA JINAN HEMÛYAN’
Gerîla Rûbar Efrîn destnîşan kir ku azadiya civakê, bi fikir û felsefeya azad dibe û got, “Avakirina civakeke azad û demokratîk wê di nava civakê de wekheviyê biafirîne wê dawî li dagirkeriya li Kurdistanê bîne. Divê mirov bi wateya jiyana xwe zanibe û zanibe ku divê çawa û çima bijî Ji bo jiyaneke bi rûmet a gelê Kurd pêwîstî bi şerê gel ê şoreşgerî heye. Yekane rêya ber bi azadî û demokrasiyê, fikir û felsefeya Rêber Apo ye.”
Rûbar Efrîn destnîşan kir ku azadiya jinê bi azadiya Rêberê Gelê Kurd Abdullah Ocalan ve girêdayî ye û di dawiya axaftina xwe de got, “Weke gerîlayekî azadiyê bang li ciwanan û bi taybetî jî jinan dikim; bila bi erka xwe rabin, şoreşa demokrasî û azadiyê ava bikin. Banga min li xelkê Merîwanê ye; divê zext û zilmê qebûl nekin. Bi taybetî divê ciwanên Kurd li ber dagirkeriyê rabin, xwedî li Rêberê Gelê Kurd derkevin û ji bo azadiyê rabin ser piyan. Azadiya Rêber Apo wê rê li ber azadiya jinên li Rojhilata Navîn hemûyan veke.”
