Serrêke ra na heta wendekara Unîversîteya Mûnzûrî ya Dêrsime, Gulistan Dokuye ra xebere çîn a.
Cenîyî do seba Gulîstan siba Dêrsime de bêrê têhet û waştişê roşnkerdişê na mesela bîyarê ziwan.
Embazê Gulîstan Dokuye yê unîversîte zî vanê: Dewlete hertim waşte înan rê bida bawerkerdene ke Gulîstane xo kişta.
GULISTAN DOKUYE KAM CAYÎ DE YA?
VÎNDÎBÎYIŞÊ GULISTAN DOKUYE SER RA, SERRÊKE DERBAS BENA
5’ê Çileya 2020’ine ra na heta tu agahî wendekara Unîversîteya Dersime Gulistan Dokû ya 21 serrî ra nêyeno girewtene.
Vînbîyayîşê Gulistane ra serrêke derbas beno.
Mîyanê na serre de cigeyrayîşê ke hetê Serdozgeriya Komarî ya Dersime amebi destpêkerdene ra tu averşîyayîş nêbi.
Derbarê versucê vînbîyayîşê Gulistan Dokuye, Zaynal Abarakov rê zî çîyêk nêame kerdene.
Bi îddîaya ke xo pirda Dînarî ra eşta war, Bendawa Ûzûnçayirî de 7’ê çilê de cigeyrayîş ame destpêkerdene.
A xebate 6’ê tîrmeha 2020’ine de ameye vindartene.
Ser waştişê keyeyê aye 7’ê tebaxe de awa bendawî ameye kêmkerdene û reyna xebata cigeyrayîşî ameye destpêkerdene.
18’ê Tebaxe de reyna xebate ameye vindartene.
15’ê Cotmehe de reya hîrêyine xebata cigeyrayîşê Gulistane ameye destpêkerdene.
Tewr peynî de 23’ê Mijdare de bi temamî xebata cigeyrayîşê Gulîstan Dokuye ameye vindartene.
Dime ra vejîya meydan ke kesê ke cigêrayîşî “xokiştişî” ser o qerar dayê , pîyê versûc Zaînal Abarakov û pîya ci poliso bi nameyê Engîn Yucelî, badê sey versûc dosya de ameyê îlawekerdene yê.
Vejîya meydan ke kesê ke “nameya xokiştişê” ya Gulistane 14’ê çileya 2020’ine de bi çapameniye pare kerdo Engîn Yucel yo polîs o.
Ne embaz, ne keye ne zî şarê Dersime bawer kenê ke Gulistane peynî ro cuwîyeya xo arda.
GULISTAN DOKUYE KAM CAYÎ DE YA?
CENÎYÎ DO SIBA DÊRSIME DE AQÛBETÊ GULÎSTAN DOKUYE PERS BIKERÊ
Embaza Gulistan Dokûye ya unîversîte Kadrîye Gengeçe vana Gulistane xo nêkişta û vat; Verpirsîyarî hewl danê ma bidê bawerkerdene ke Gulistane xo kişta.
Kadriye Gengeçe diyar kerd ke dewlete hewl dano Zaynal bêsuc bikera.
Embaza Gulistane Melek Akaye zî vat: Ma çi vatîy, verpesîyarê dewleta Tirke xo lal û kerr kerde.
Endama Platforma cenîyan a Dersime Raîfe Yilmaze zî diyar kerd ke seba vînayîşê Gulistane tu rayîrêko qanûnî nêameyo caardene.Hemseroka HDP’a Dersime Nûrşat Yeşîle zî vat ke cigeyrayîşêko verhîra nêameyo kerdene.
Heto bîn ra, cenîyî 5’ê Çile de seba aqubeta Gulîstane bipersê Dersime de yenê têhet.
Endama Komîsyonê Edaletî yê seba Gulistan Dokûye Hêlîn Yagmûr Ûcîye, seba çalakiya 5’ê Çile veng daye cenîyan ke tewrê çalakîye bibê.
Hêlîn Yagmûr vat: berê ma bibê vengê Gulistane.
