Hemseroka Konseya Rayirbere ya KCK yî Besê Hozate, derheqê qitilkerdişê cînîyan, pergala tacîz û tecewuzî ya Kurdistanî de zî vat.
Tecawiz perçeyêke konseptê şerrê qirkerdişî yê îqtîdarê AKP-MHP yo.
Hemseroka Konseya Rayîrbere ya KCK yî Besê Hozate, derheqê qitilkerdişê cînîyan, pergala tacîz û tecewuzî ya Kurdistanî de zî nêy vatîy.
Tekoşîna Cînîyanê Kurdan, civatî de şoreşêka zîhnîyetî pêk arde. Cînîyanê tirkan zî naye ra cesaret û îlham girewt. Na rewşe hetê îqtîdarê faşîstî ra baş amî dîyiş.
Bi no sebeb êrîşê cînîyan kenê. Bi goreyê înan, heke cînîy bêrê bêîradekerdiş, do civat zafêrî lez bêro teslîmgirewtiş.
Tecawiz zê perçeyêkê polîtîkayanê qirkerdişî, Kurdistan de, yeno rayirberdiş.
“Tecawizê verva cînîyan êy Kurdistanî, bi destê faşîzmê AKP-MHP û telîmatê Soylûyî pêk yenê.
Îqtîdaro faşîst yê AKP-MHP, Kurdistanî cayê îşgalkerdişî û cînîyanê Kurdan zî zê xenîmetê îşgalî, vîneno. Bi no sebeb nêtersenê, nînê girotiş û cezakerdiş.
No konseptêkê qirkerdişê civatî yo. Ya ke ma aciz kena, senî cînîyê ciwanîy bi polîs û eskeranê tirkan reyde, kewenê mîyanê têkilîyanê heskerdişî.
Merdim senî neyarê şarê xo ra hes keno?
Gere cînîyê ciwanî û şarê ma di na mijare de, heşîyarîy bê.
Gere tu cînîyêka ciwane ya Kurde, aşiqê qatil û tecawizkaran nêbo”.
Hemseroka Konseya Rayirbere ya KCK’yî Besê Hozate derheqê êrîşanê dewleta tirke û hemkarîya PDK de zî nêy vatîy.
Şaro Kurd di pêvajoyêka tarîxî ra derbas beno.
Wazenê polîtîkayanê se serra ravêrtîye, na se serre de zî pêk bîyarê û heme destkewteyanê Şarê Kurdî çinê bikerê. Bi no sebeb, Şaro Kurd bi talûkeyê pîlan reyde ri bi ri yo.
La çi heyf tay hêz û partîyê Kurdan, nêwazenê naye fehm bikerê û benê aletê nêy polîtîkyayanê dewleta tirke.
Ma na ra ver vatbi; “PDK, di mîyanê plananê qirkerdişî êy dewleta tirke de ca gena.
Na plane, plana di şexsê PKK yî de, têkberdişê Şarê Kurdî ya.
La PDK heta nika verva na eşkerayîya ma, çîyêke nêvat û nêvat ma perçeyêkê na plane nîyê. Sazîyêka giredayeyê PDK eşkerayîyêke kerde, la muxatabê ma a sazî nê, PDK bixo ya.
Gere PDK cewab bido a eşkerayîya ma. Heke cewab nêdo se, no yeno o mehne ke, PDK naye qebûl kena û di qirkerdişê şarî Kurdî de, bi dewleta tirke reyde mîyanê hemkarî û şirîkatîye de ya”.
Hozate di vatişê xo wina bi peynî kerdîy.
“Heke bi no sebeb maberê PKK û PDK de şerrêke vecîyo no şerrê birakujî nê, şerrê maberê PKK û dişmenanê Şarê Kurdî yo. Hêza ke verva Şarê Kurdî, kişta dişmenî de ca bigero, bira nê dişmen a.
Gere na wina bêro zanayene”.
