SALVEGERA DARVEKIRINA DENÎZ, HUSEYÎN Û YUSUF
DBP, HDP, HDK Û GELEK SAZIYAN PEYAMA XURTKIRINA TÊKOŞÎNA WAN DAN
Denîz Gezmîş, Yûsûf Aslan û Huseyîn Înan di salên 70’î de bi têkoşîna xwe bûbûn sembola Ciwanên Şoreşger ên Tirkiyê.
Ji ber têkoşîna şoreşgerî di 6’ê gulana 1972’an de hatin dardekirin.
Denîz, Yûsûf û Huseyîn li ber rêveberiya faşîst serî netewand.
Denîz Gezmîş dema dardekirinê silogana “Bijî biratiya gelê Tirk û Kurd” qîriya.
Bi wesîleya salvegerê, Denîz, Huseyîn û Yusuf bi çalakî û daxuyaniyan hatin bi bîr anîn.
DBP’ê bi daxuyaniyekê Denîz, Huseyîn û Yusuf bi bîr anîn û diyar kir ku ewê têkoşîna demokrasî û azadiyê xurt bikin.
HDP’ê jî her 3 şoreşger bi bîr anîn û anî ziman ku rêveberiya demê ya Tirkiyê, di şexsê Denîz, Huseyîn û Yusuf de, xwest têkoşîna gelan a wekhevî, azadî û şoreşê tine bike.
HDP got: Kesên ew şoreşger darde kirin, di nava şermeke mezin de dijîn. Lê belê Şoreşger wekî doh, îro jî bi serbilindî meşa azadiyê didomînin.
Kongreya Demokratîk a Gelan HDK û gelek partî, rêxistin û saziyên şoreşger û demokratîk bi daxuyaniyên cûda Denîz, Huseyîn û Yusuf bi bîr anîn.