Nêrazîbîyişê şarê Kurdî êy verva êrîşanê îşgalî û provakasîyonanê PDK, heme perçeyan de dewam kenê.
Ciwananê Kelare, verva kel û pelê dewleta tirke dest bi kampanîyaya boykotî kerd.
Verkêşîya kampanîya bi şîarê “Bêrê Cenga Şoreşe” de hetê Ciwananê Welatpawêran û Cînîyê Ciwanîy êy Têkoşeran ra yena kerdene.
Ciwanan di çarçoveya kampanîya de vilavokîy vila kerdîy û şarî ra waşt ke fîlman ra heta malê werî û şimitişî, heme kel û pelê dewleta tirke bêrê boykotkerdene.
00:50
Derheqê çalakîye û mexsedê kampanîya de ciwanê bi nameyê Çiya Germîyanî vat;
Dewleta îşgalkere, rixmê îşgalkerîya eskerî bi rayira rêzefîlman û kel û pelî, hewl dana ke hetê çandî ra zî,Vaşûrê Kurdistanî îşgal bikero.
Seba naye ma veng ro şarê xo kenê ke, heşîyar bo û verva na îşgalkerîya çandî û heme kel û pelê dewleta îşgalkere, tewê boykotî bibo.
Heman Kampanîya Ranya û Raperîne de zî amî destpêkerdene.
Ciwananê Ranya zî vat; Gere heme hetî ra verva îşgalkerîya dewleta tirke bêro vindarnayene.
CIWANÊ ÊZÎDÎ ÊY ŞENGALE:
“HEKE PKK ÇINÊ BIBO ÇÎYÊKE BI NAMEYÊ KURD Û KURDISTANÎ NÊMANENO”
Ciwananê şengale zî verva îşgalkerîya dewleta tirke û provakasîyonanê PDK meş ro dar vist.
Meş bi verkêşîya Yewîtîya Ciwananê Êzîdîyan û Yewîtîya Cînîyê Ciwanîy êy Êzîdîyan ame rodarvistene.
Ciwanan vat; Ke gêrîlla nêmano do çîyêke bi nameyê Kurd û Kurdistanî zî nêmano.
Ciwanan veng ro heme cînî, ciwan û şarê Kurdî kerd ke “Bêrê Cenga Azadîye” û verva îşgalkerîye tekoşîne berz bikerê.
Ciwanan verê Meclîsa Şarî ya Şengale de eşkerayîyêke da.
CIWANÊ ÊZÎDÎ ÊY ŞENGALE:
“WA PDK TAFIL ÇEKDARANÊ XO HEREMANÊ GÊRÎLLAYAN RA APEY BIANCO”
Eşkerayî hetê Selîm Şengalîyî ra amî wendene.
Di eşkerayîye de ame vatiş wa NATO û Keyeyê Barzanîyan destê xo Kurdistanî ra biancê û nêbê sebebê şerrê xomîyanî.
Wa pêşmergey nêkewê na defike ke do seba şarê Kurî bibo felaketêka pîle.
Wa PDK tafil çekdarnê xo heremanê gêrîllayî ra bianco.
